سارہ خان اور فلک شبیر کے ہاں دوسری بیٹی کی پیدائش

پاکستان شوبز انڈسٹری کی معروف اداکارہ سارہ خان اور نامور گلوکار فلک شبیر کے گھر ایک بار پھر ننھے مہمان کی آمد ہوئی ہے، جس پر ان کے ہاں خوشیوں کا سماں ہے۔ اداکارہ سارہ خان نے اپنے آفیشل انسٹاگرام اکاؤنٹ پر نومولود کی پہلی تصویر شیئر کرتے ہوئے مداحوں کو اس بڑی خوشخبری سے آگاہ کیا۔ انہوں نے بتایا کہ ان کے ہاں دوسری بیٹی کی پیدائش ہوئی ہے جس کا نام انہوں نے ’’رانیہ فلک‘‘ رکھا ہے۔ اس پوسٹ کے سامنے آتے ہی جہاں سوشل میڈیا پر مداحوں کی جانب سے محبت بھرے پیغامات کی بھرمار ہو گئی، وہی شوبز انڈسٹری کے نامور ستاروں بشمول سمیع خان، شگفتہ اعجاز اور نور ظفر خان نے بھی اس خوبصورت جوڑی کو بیٹی کی پیدائش پر دلی مبارکباد پیش کی اور ننھی پری کے لیے نیک تمناؤں کا اظہار کیا۔

واضح رہے کہ سارہ خان کا شمار پاکستان کی صفِ اول اور مقبول ترین اداکاراؤں میں ہوتا ہے، جنہوں نے متعدد ہٹ ڈراموں میں اپنی جاندار اداکاری کے جوہر دکھائے ہیں، جبکہ وہ انسٹاگرام پر ایک کروڑ سے زائد فالوورز رکھنے والی چند نمایاں ترین پاکستانی شخصیات میں بھی شامل ہیں۔ یاد رہے کہ سارہ خان اور فلک شبیر جولائی 2020 میں رشتہ ازدواج میں منسلک ہوئے تھے اور ان کی پہلی بیٹی کا نام ’الیانا فلک‘ ہے، جبکہ اب رانیہ فلک کی آمد نے ان کی فیملی اور خوشیوں کو مکمل کر دیا ہے۔