سنگیتا کی معمر رانا کے معاوضے کی رقم سے متعلق وضاحت

پاکستان فلم اور ٹی وی انڈسٹری کی سینئر اداکارہ و معروف ہدایت کارہ سنگیتا نے اپنی آنے والی فلم “مکھو” کے مرکزی اداکار معمر رانا کے معاوضے سے متعلق گردش کرنے والی تمام افواہوں کو یکسر مسترد کر دیا ہے۔ گلوکار ذیشان روکھڑی کی جانب سے کم معاوضے کے دعوؤں کا جواب دیتے ہوئے سنگیتا نے وضاحت کی کہ معمر رانا ان کے بیٹے کی طرح ہیں اور ان کے ساتھ 05 لاکھ روپے ‘فی دن’ معاوضے پر معاہدہ طے پایا تھا۔ ہدایت کارہ کے مطابق فلم کی عکس بندی 08 دنوں پر محیط تھی، جس کے تحت معمر رانا کو مجموعی طور پر 40 لاکھ روپے کا معاوضہ ادا کیا گیا ہے۔ سنگیتا نے مزید کہا کہ معمر رانا کوئی عام اداکار نہیں بلکہ انہوں نے ‘چوڑیاں’ جیسی بلاک بسٹر فلمیں دی ہیں، اور امید ظاہر کی کہ فلم “مکھو” کے ذریعے ان کی فلم انڈسٹری میں شاندار واپسی ہوگی۔