پاکستان آتے ہی ایک ماہ میں 6 ای چالان ہو گئے: صنم جنگ

پاکستانی شوبز انڈسٹری کی معروف میزبان و اداکارہ صنم جنگ نے کراچی میں نافذ العمل ای چالان سسٹم پر حیرانی اور پریشانی کا اظہار کیا ہے۔ انسٹاگرام پر شیئر کی گئی ایک ویڈیو میں انہوں نے بتایا کہ انہیں پاکستان آئے ہوئے صرف ایک ماہ ہوا ہے اور اس دوران ان پر 6 بار ڈرائیونگ کا جرمانہ عائد کیا جا چکا ہے، جس کی وجہ سے ان کے والد بھی ان سے خاصے ناراض ہیں۔ اداکارہ نے اعتراف کیا کہ پہلا چالان دورانِ ڈرائیونگ موبائل فون استعمال کرنے پر ہوا جو ان کی اپنی غلطی تھی، لیکن باقی چالان ایسی چیزوں پر ہوئے جو انہوں نے کی ہی نہیں۔ صنم جنگ کا کہنا تھا کہ ان پر سیٹ بیلٹ نہ پہننے کا بھی چالان کیا گیا، جبکہ بیرونِ ملک رہنے کی وجہ سے سیٹ بیلٹ لگانا ان کی پکی عادت ہے اور وہ اس کے بغیر گاڑی اسٹارٹ بھی نہیں کرتیں۔ انہوں نے شکوہ کیا کہ انہیں سمجھ نہیں آ رہی کہ بغیر کسی غلطی کے ان پر جرمانے کیوں تھوپے جا رہے ہیں۔