اداکار ثمر جعفری کا سفرِ کربلا، حرم امام حسین میں نوحہ پڑھنے کی ویڈیو وائرل

پاکستان شوبز انڈسٹری کے معروف نوجوان اداکار و گلوکار سمر جعفری نے مقدس شہر کربلا میں نوحہ خوانی کر کے حضرت امام حسین علیہم السلام اور شہدائے کربلا سے اپنی گہری عقیدت و احترام کا اظہار کیا ہے، جس کی ویڈیو سوشل میڈیا پر مداحوں کی جانب سے خوب پسند کی جا رہی ہے۔

ماہِ صفر المظفر کے مبارک ایام میں سمر جعفری مقدس مقام کربلا میں موجود ہیں، جہاں سے سامنے آنے والی وائرل ویڈیو میں انہیں منبر پر کھڑے ہو کر باوقار اور روح پرور انداز میں نوحہ خوانی کرتے ہوئے دیکھا جا سکتا ہے۔ ویڈیو منظرِ عام پر آتے ہی سوشل میڈیا صارفین اور مداحوں کی جانب سے محبت، پسندیدگی اور نیک خواہشات کے پیام کا تانتا بندھ گیا۔ صارفین نے ان کے اس انداز کو شدید سراہا اور منبر پر نوحہ خوانی کے اس اعزاز کو ان کی عظیم خوش نصیبی قرار دیا۔

واضح رہے کہ سمر جعفری نے ہٹ ڈرامہ سیریل ’مائی ری‘ (Mayi Ri) سے بے پناہ شہرت حاصل کی، جبکہ بعد ازاں ڈرامہ ’پرورش‘ میں بھی اپنی شاندار اداکاری کے ذریعے ڈرامہ بینوں کے دل جیتے۔ فنکارانہ صلاحیتوں، گلوکاری اور اداکاری کے ساتھ ساتھ وہ اکثر و بیشتر روحانیت اور دینی اقدار سے اپنی گہری وابستگی کا اظہار کرتے رہتے ہیں۔