سجل علی کا منفرد اور بولڈ ہیئر سٹائل، مداحوں کی توجہ کا مرکز

پاکستان کی نامور اداکارہ سجل علی اپنے نئے اور منفرد انداز کی وجہ سے سوشل میڈیا پر توجہ کا مرکز بن گئی ہیں۔ اداکارہ نے حال ہی میں انسٹاگرام پر اپنی چند تصاویر شیئر کیں جن میں وہ اپنے روایتی لمبے بالوں کے بجائے شارٹ ’بوائے کٹ‘ ہیئر اسٹائل میں نظر آ رہی ہیں۔ ہائی کالر لباس اور اس بولڈ لک کے ساتھ انہوں نے اپنی پوسٹ کو “11:11 Hi” کا سادہ سا کیپشن دیا، جس نے مداحوں کو حیرت زدہ کر دیا۔

سجل علی نے اپنی انسٹاگرام اسٹوریز میں بغیر میک اپ کے ’مرر سیلفیز‘ بھی شیئر کیں، جنہیں مداحوں نے ان کے قدرتی حسن اور خود اعتمادی کی وجہ سے خوب سراہا۔ شوبز انڈسٹری کی معروف شخصیات نے بھی اس تبدیلی پر دلچسپ تبصرے کیے۔ ان کی بہن صبور علی نے خوشی کا اظہار کرتے ہوئے لکھا کہ “یہی تو میں چاہتی تھی”، جبکہ اداکارہ اشنا شاہ نے اسے کسی بڑے پروجیکٹ کا پیش خیمہ قرار دیتے ہوئے کہا کہ “کچھ دلچسپ ہونے والا ہے”۔ امر خان اور سعدیہ غفار سمیت دیگر ساتھی اداکاروں نے بھی سجل کے اس نئے اوتار کو “مین کریکٹر وائب” قرار دیا۔

مداحوں کی جانب سے سجل علی کے اس اسٹائل کو غیر متوقع مگر انتہائی شاندار قرار دیا جا رہا ہے۔ سوشل میڈیا صارفین کا ماننا ہے کہ سجل علی ہر طرح کے چیلنجنگ لک کو بخوبی نبھانا جانتی ہیں اور ان کا یہ نیا انداز ان کے کیریئر کی کسی نئی اور بڑی شروعات کا اشارہ ہو سکتا ہے۔