شہری کے اغوا اور بھتہ خوری کیس میں راولپنڈی پولیس کا اہلکار دو ساتھیوں سمیت گرفتار

شہری کی شکایت پر سٹی پولیس آفیسر (سی پی او) راولپنڈی حسن مشتاق سکھیرا نے فوری نوٹس لیتے ہوئے تھانہ چکلالہ میں تعینات کانسٹیبل محسن ضیاء اور اس کے دو نجی ساتھیوں کے خلاف انکوائری کے احکامات جاری کیے۔ محکمہ جاتی تحقیقات میں الزامات درست ثابت ہونے پر تینوں ملزمان کو سی پی او آفس سے ہی گرفتار کر لیا گیا۔ پولیس کے مطابق ملزمان کے خلاف اغوا اور بھتہ خوری کی سنگین دفعات کے تحت تھانہ چکلالہ میں مقدمہ درج کر لیا گیا ہے۔

شکایت کنندہ شہری نے پولیس کو دیے گئے بیان میں مؤقف اختیار کیا کہ پولیس اہلکار نے اپنے نجی ساتھیوں کے ساتھ مل کر اسے جھوٹے مقدمے میں پھنسانے کی دھمکی دی، جس کے بعد اسے اغوا کر کے بلیک میل کیا گیا اور بھاری رقم وصول کرنے کے بعد رہا کیا گیا۔ سی پی او حسن مشتاق سکھیرا نے اس موقع پر واضح کیا کہ پولیس فورس میں بدعنوانی، اختیارات کے ناجائز استعمال اور شہریوں سے زیادتی پر “زیرو ٹالرنس” پالیسی نافذ العمل ہے۔ انہوں نے کہا کہ ملزمان کو ٹھوس شواہد کی روشنی میں سخت سے سخت سزا دلوانے کے لیے چالان عدالت میں پیش کیا جائے گا۔