رشمیکا مندانا شوٹنگ کے دوران شدید زخمی

نامور بھارتی اداکارہ رشمیکا مندانا اپنی آنے والی فلم کے ایک مشکل ڈانس سین کی عکسبندی کے دوران شدید زخمی ہو گئی ہیں، جس کے بعد طبی ماہرین نے انہیں کم از کم چھ ہفتے تک مکمل آرام کرنے اور فزیوتھراپی کا عمل جاری رکھنے کا مشورہ دیا ہے۔

بھارتی میڈیا رپورٹس کے مطابق ایکشن اور ڈانس کی عکسبندی کے دوران رشمیکا کے کولہے کے پٹھے کا جوڑ شدید متاثر ہوا اور پٹھا اپنی جگہ سے الگ ہو گیا۔ ڈاکٹروں کا کہنا ہے کہ اس نوعیت کی چوٹیں اور شدید دباؤ عموماً پیشہ ورانہ کھلاڑیوں میں دیکھا جاتا ہے، جو اس بات کی عکاسی کرتا ہے کہ اداکارہ شوٹنگ کے دوران کس قدر سخت اور پرمشقت جسمانی سرگرمیوں سے گزر رہی تھیں۔

رپورٹس میں بتایا گیا ہے کہ رشمیکا مندانا گزشتہ کچھ عرصے سے اپنی آنے والی فلموں ’رن بالی‘ (Ranabaali) اور ’میسا‘ (Mysaa) کی شوٹنگ کے لیے مسلسل مصروف تھیں، جہاں انہیں انتہائی سخت ایکشن اور ڈانس کے مناظر خود انجام دینا پڑ رہے تھے۔ مسلسل جسمانی مشقت کے باعث ان کے جسم پر غیر معمولی دباؤ پڑا جو اس انجری کی بنیادی وجہ بنا۔

ڈاکٹروں نے واضح کیا ہے کہ مکمل صحت یابی تک انہیں باقاعدہ فزیوتھراپی اور علاج کی سخت ضرورت ہوگی، جبکہ ان کی جسمانی کیفیت پر مسلسل نظر رکھی جائے گی۔ مکمل بحالی کے بعد ہی انہیں دوبارہ فلم بندی کی اجازت دی جائے گی، جس کے باعث ان کے آئندہ تمام فلمی منصوبوں کی شوٹنگ وقتی طور پر روک دی گئی ہے۔