’آج میں نے خوف کے بجائے ہمت کا انتخاب کیا‘، گلوکار بادشاہ کی اہلیہ کی ذومعنی پوسٹ وائرل

بھارتی نامور گلوکار و ریپر بادشاہ اور ان کی اہلیہ و اداکارہ ایشا رکھی کے درمیان علیحدگی کی افواہوں نے ایک بار پھر زور پکڑ لیا ہے، جس کی بڑی وجہ اداکارہ کی جانب سے سوشل میڈیا پر شیئر کی گئی مسلسل ذومعنی پوسٹس ہیں۔

حال ہی میں ایشا رکھی نے انسٹاگرام پر ایک اسٹوری شیئر کی تھی جس میں انہوں نے اپنی اور بادشاہ کی شادی کی دو ویڈیوز شامل کیں اور کیپشن میں لکھا کہ “ہر طوفان ایک سبق ہے اور ہر دعا ایک امید ہے۔” اس پوسٹ کے بعد سے ہی سوشل میڈیا پر جوڑے کے درمیان ممکنہ علیحدگی اور تعلقات میں کشیدگی سے متعلق قیاس آرائیاں شروع ہو گئی تھیں۔

ان افواہوں کے دوران اب ایشا رکھی نے انسٹاگرام پر ایک اور مبہم اسٹوری شیئر کی ہے جس میں انہوں نے واضح طور پر رشتے کے اندرونی مسائل اور کشیدگی کی جانب اشارہ کیا ہے۔ اداکارہ نے لکھا کہ “کچھ لڑائیاں ایسی ہوتی ہیں جو کوئی ظاہری نشان نہیں چھوڑتیں۔” ان کی اس نئی پوسٹ کے بعد مداحوں اور سوشل میڈیا صارفین کی تشویش میں مزید اضافہ ہو گیا ہے۔