دھرندھر کی کامیابی کے بعد رنویر کی دپیکا سے ملاقات کی تصویر وائرل

ممبئی: بالی ووڈ کے مقبول ترین جوڑے، رنویر سنگھ اور دیپیکا پڈوکون کی ایک نئی تصویر سوشل میڈیا پر تیزی سے وائرل ہو رہی ہے جس میں انہیں ممبئی کے ایک مقامی ریسٹورنٹ میں سادہ اور پُرسکون وقت گزارتے دیکھا جا سکتا ہے۔ یہ تصویر ریسٹورنٹ کے عملے کی جانب سے شیئر کی گئی، جس میں رنویر سنگھ کے والد جگجیت سنگھ بھاونانی بھی ان کے ہمراہ موجود تھے۔

تصویر میں 40 سالہ رنویر سنگھ سیاہ ٹی شرٹ، سفید کیپ اور سن گلاسز پہنے سیلفی لے رہے ہیں، جبکہ ان کے ساتھ کھڑی دیپیکا پڈوکون مسکراتے ہوئے ‘پیس سائن’ بنا رہی ہیں۔ رنویر سنگھ ان دنوں اپنی حالیہ ریلیز ہونے والی فلم ‘دھرندھر 2’ کی کامیابی کا جشن منا رہے ہیں۔ 19 مارچ کو ریلیز ہونے والی اس فلم میں رنویر نے ایک بھارتی جاسوس کا کردار ادا کیا ہے، جس کی کہانی میں انہیں کراچی کے علاقے لیاری میں ایک مشن پر دکھایا گیا ہے۔

دوسری جانب، دیپیکا پڈوکون کے پاس بھی بڑے پروجیکٹس کی لائن لگی ہوئی ہے۔ ‘سنگھم اگین’ میں جلوہ گر ہونے کے بعد، وہ اب کنگ خان یعنی شاہ رخ خان کے ساتھ فلم ‘کنگ’ کی تیاریوں میں مصروف ہیں۔ اس کے علاوہ وہ ساؤتھ کے سپر اسٹار الو ارجن کے ساتھ ہدایت کار اٹلی کے نئے پراجیکٹ میں بھی نظر آئیں گی، جس کا مداحوں کو بے صبری سے انتظار ہے۔