پی پی کے دھاندلی کے الزامات میں تضاد، پہلے 13 پھر 2 نشستوں کا دعویٰ کیا: رانا ثنا اللہ

وزیراعظم کے مشیر برائے سیاسی امور رانا ثنا اللہ نے وفاقی وزیر امیر مقام کے ہمراہ اسلام آباد میں پریس کانفرنس کرتے ہوئے پاکستان پیپلز پارٹی کے دھاندلی سے متعلق الزامات کو متنازع اور متضاد قرار دیا ہے۔ انہوں نے کہا کہ آزاد کشمیر کے انتخابات میں پولنگ کا عمل مجموعی طور پر انتہائی پرامن ماحول میں مکمل ہو چکا ہے اور عوام نے اپنے حقِ رائے دہی کا بھرپور استعمال کیا۔ رانا ثنا اللہ نے نشاندہی کی کہ پیپلز پارٹی نے پولنگ کے آغاز سے ہی دھاندلی کا واویلا شروع کر دیا تھا اور ابتدا میں 13 نشستوں پر بے ضابطگیوں کا دعویٰ کیا، جسے بعد میں خود ہی کم کر کے صرف دو نشستوں تک محدود کر دیا، جو ان کے اپنے بیانیے کے تضاد کو واضح کرتا ہے۔

مشیر وزیراعظم نے چوہدری لطیف اکبر کے ساتھ پیش آنے والے واقعے کی وضاحت کرتے ہوئے کہا کہ یہ محض مخالف برادری کے افراد کے ساتھ تلخ کلامی کا معاملہ تھا، جسے پیپلز پارٹی کی جانب سے بلاجواز “قاتلانہ حملہ” قرار دیا جا رہا ہے۔ انہوں نے مزید بتایا کہ مقامی شواہد کے مطابق واقعے میں جاں بحق ہونے والے شخص کو دل کا دورہ پڑا تھا اور وہ پیپلز پارٹی کا کارکن بھی نہیں تھا۔ رانا ثنا اللہ نے بلاول بھٹو زرداری کو مخاطب کرتے ہوئے کہا کہ وہ ایک اہم اور سنجیدہ قومی رہنما ہیں، لیکن ان کی پارٹی کے کچھ افراد انہیں غلط اور غیر مصدقہ حقائق کی بنیاد پر گمراہ کر رہے ہیں، لہٰذا انہیں حقائق کو پیشِ نظر رکھ کر ہی کوئی سیاسی موقف اختیار کرنا چاہیے۔