ایرانی سپریم لیڈر خامنہ ای نے حالیہ فسادات کو امریکا و اسرائیل کی سازش قرار دے دیا

ایرانی سپریم لیڈر آیت اللہ خامنہ ای نے حالیہ فسادات کو امریکا اور اسرائیل کی منصوبہ بندی اور سازش قرار دیا ہے، اور کہا کہ ایرانی قوم نے اس سازش کو ناکام بنا دیا ہے۔

سوشل میڈیا پر جاری بیان میں آیت اللہ خامنہ ای نے کہا کہ یہ الزام نہیں بلکہ امریکی صدر کے بیانات اس بات کا واضح ثبوت ہیں کہ فسادات کی منصوبہ بندی بیرونِ ملک سے کی گئی تھی۔ سپریم لیڈر کے مطابق حالیہ فسادات درحقیقت بغاوت کی ایک کوشش تھی جسے بیرونِ ملک سے کنٹرول کیا جا رہا تھا، اور اس مقصد کے لیے سی آئی اے اور موساد نے تمام وسائل استعمال کیے، تاہم انہیں ناکامی کا سامنا کرنا پڑا۔

آیت اللہ خامنہ ای نے مزید کہا کہ ایران عالمی جارح طاقتوں کے مفادات سے ٹکرا رہا ہے، اس لیے یہ کہنا درست نہیں کہ ملک میں حالیہ فسادات آخری ہوں گے۔ ان کا کہنا تھا کہ یہ سلسلہ جاری رہے گا جب تک دشمن مکمل طور پر مایوس نہ ہو جائے، اور ایرانی قوم اس مشن میں کامیاب ہو کر رہے گی۔