اداکار راجپال یادو کی اہلیہ کا بولی ووڈ اسٹارز کی مدد پر شکریہ

نئی دہلی: معروف کامیڈین اور اداکار راجپال یادو کی اہلیہ رادھا یادو نے بولی ووڈ اسٹارز اور فلم انڈسٹری کی جانب سے بھرپور تعاون پر سب کا شکریہ ادا کیا ہے۔ راجپال یادو اس وقت دہلی کی تہاڑ جیل میں قانونی مسائل کے سبب زیرِ حراست ہیں۔

ذرائع کے مطابق اداکار کو تقریباً 9 کروڑ روپے ادا کرنے ہیں۔ سونو سود، میکا سنگھ، گرومیت چودھری، سلمان خان، اجے دیوگن اور ورون دھون سمیت کئی فلمی شخصیات نے مالی معاونت اور مدد کا وعدہ کیا ہے۔ ان کے منیجر گولڈی کے مطابق خاندان اس مرحلے سے حوصلے کے ساتھ گزر رہا ہے اور امید ہے کہ ضمانت کی سماعت کے بعد مثبت پیش رفت ہوگی۔

یہ قانونی معاملہ 2010 میں راجپال یادو کی ہدایت کاری میں بننے والی فلم “اتا پتا لاپتا” سے متعلق پرانے قرض پر مبنی ہے، جس کی واپسی نہ ہونے کی وجہ سے عدالت نے سخت مؤقف اختیار کیا۔