جوا ایپ پروموشن کیس میں یوٹیوبر رجب بٹ کو ریلیف مل گیا

لاہور: لاہور کی سیشن عدالت نے آن لائن جوا ایپ (Online Gambling App) کی غیر قانونی تشہیر اور پروموشن کے کیس میں نامور یوٹیوبر رجب بٹ کی عبوری ضمانت کنفرم (مستقل) کر دی ہے، جبکہ اسی کیس کے دوسرے معروف سوشل میڈیا انفلوئنسر ندیم نانی والا کی عبوری ضمانت میں توسیع کا حکم جاری کیا ہے۔

ذرائع کے مطابق سیشن عدالت میں جوا ایپ کی غیر قانونی تشہیر سے متعلق دائر کیس کی اہم سماعت ہوئی، جس میں یوٹیوبر رجب بٹ، ندیم نانی والا اور دیگر نامزد ملزمان کی عبوری ضمانتوں پر تفصیلی غور کیا گیا۔سماعت کے دوران معزز عدالت نے وکلا کے دلائل سننے کے بعد درج ذیل احکامات جاری کیے: عدالت نے معروف یوٹیوبر رجب بٹ کی عبوری ضمانت کو مستقل کرنے کا فیصلہ سنایا۔کیس کے دوسرے مرکزی ملزم ندیم نانی والا کو فوری ریلیف نہ مل سکا اور عدالت نے ان کی عبوری ضمانت میں 2 جون تک توسیع کر دی ہے۔ عدالت نے ندیم نانی والا کے قانونی وکلا کو سخت ہدایت جاری کی ہے کہ وہ اگلی پیشی یعنی آئندہ سماعت پر ہر صورت اپنے دلائل مکمل کریں۔