جواایپ پروموشن کیس: رجب بٹ سمیت ملزمان کی عبوری ضمانت میں توسیع

لاہور کی سیشن کورٹ میں جوا ایپ کی مبینہ غیر قانونی پروموشن سے متعلق کیس کی سماعت کے دوران معروف یوٹیوبر رجب بٹ اور ندیم مبارک سمیت دیگر ملزمان کی عبوری ضمانت میں 28 اپریل تک توسیع کر دی گئی ہے۔ ایڈیشنل سیشن جج ذوالفقار احمد نے کیس کی سماعت کی، جس میں ملزمان عدالت کے روبرو پیش ہوئے، تاہم این سی سی آئی (NCCI) کے تفتیشی افسر اور پراسیکیوٹر کی عدم دستیابی کے باعث کارروائی مکمل نہ ہو سکی۔ عدالت نے تفتیشی ٹیم کی غیر حاضری پر برہمی کا اظہار کرتے ہوئے آئندہ سماعت پر متعلقہ حکام کو تمام ریکارڈ سمیت بروقت حاضری یقینی بنانے کی سخت ہدایت جاری کی ہے۔ واضح رہے کہ ملزمان کے خلاف جوا ایپ کی غیر قانونی تشہیر اور نوجوان نسل کو سوشل میڈیا کے ذریعے متاثر کرنے کے الزامات کے تحت مقدمہ درج ہے، جس کی مزید تحقیقات جاری ہیں۔