ملک کے مختلف حصوں میں آج سے 3 فروری تک بارش اور برفباری کا امکان

محکمہ موسمیات نے آج سے 3 فروری تک ملک کے مختلف علاقوں میں بارش اور برفباری کی پیش گوئی کرتے ہوئے خبردار کیا ہے کہ اس دوران پہاڑی علاقوں میں لینڈ سلائیڈنگ کا خطرہ بڑھ سکتا ہے۔

محکمہ موسمیات کے مطابق شمالی بلوچستان اور شمالی علاقوں میں آئندہ چند روز کے دوران بارش اور برفباری متوقع ہے، جبکہ گلگت بلتستان، آزاد کشمیر اور خیبرپختونخوا کے مختلف حصوں میں بھی بارش اور برفباری ہو سکتی ہے۔

رپورٹ کے مطابق اسلام آباد اور خطہ پوٹھوہار میں بارش کا امکان ہے، جبکہ پنجاب، مری اور گلیات میں بھی بارش اور برفباری متوقع ہے۔

محکمہ موسمیات نے خبردار کیا ہے کہ اس دوران بالائی خیبرپختونخوا، گلگت بلتستان اور کشمیر کے پہاڑی علاقوں میں لینڈ سلائیڈنگ کا خدشہ ہے، جس کے باعث شہریوں، سیاحوں اور مسافروں کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔