جنوری 2026 میں ایف بی آر کی ریونیو وصولیوں میں نمایاں تیزی، آمدن میں 16 فیصد اضافہ

فیڈرل بورڈ آف ریونیو (ایف بی آر) کی جانب سے جاری کردہ اعداد و شمار کے مطابق جنوری 2026 کے دوران ٹیکس ریونیو کی وصولیوں میں نمایاں بہتری ریکارڈ کی گئی ہے۔ ایف بی آر نے جنوری میں مجموعی طور پر ایک ہزار 15 ارب روپے ٹیکس جمع کیا جو گزشتہ سال جنوری کے مقابلے میں 16 فیصد زیادہ ہے۔

ایف بی آر کے مطابق رواں مالی سال کے پہلے سات ماہ میں مجموعی ٹیکس وصولی 7 ہزار 176 ارب روپے تک پہنچ گئی ہے، جبکہ گزشتہ مالی سال کے اسی عرصے میں یہ وصولیاں 6 ہزار 490 ارب روپے تھیں۔ حکام کا کہنا ہے کہ ریونیو میں یہ اضافہ اصلاحاتی اقدامات اور مؤثر نفاذ کا نتیجہ ہے۔

جنوری 2026 میں براہِ راست ٹیکس وصولیوں میں 26 فیصد کا شاندار اضافہ ہوا، جس کے نتیجے میں انکم ٹیکس کی وصولی 483 ارب روپے تک پہنچ گئی، جبکہ گزشتہ سال جنوری میں انکم ٹیکس کی وصولی 381 ارب روپے تھی۔ ایف بی آر کے مطابق انکم ٹیکس میں اضافہ بہتر نفاذ اور اصلاحات کا مظہر ہے۔

اسی طرح سیلز ٹیکس کی مد میں جنوری 2026 کے دوران 360 ارب روپے جمع کیے گئے، جو گزشتہ سال کے مقابلے میں 12 فیصد اضافہ ظاہر کرتے ہیں۔ ایف بی آر کا کہنا ہے کہ سیلز ٹیکس وصولیوں میں بہتری بڑی صنعتوں کی پیداوار میں اضافے کی عکاس ہے، جبکہ لارج اسکیل مینوفیکچرنگ (LSM) میں بہتری کو حوصلہ افزا پیش رفت قرار دیا گیا ہے۔

ایف بی آر کے مطابق براہِ راست ٹیکس میں اضافے سے رضاکارانہ ٹیکس ادائیگی کے رجحان میں بہتری آئی ہے، جبکہ اصلاحات کے باعث ٹیکس نیٹ میں وسعت اور ٹیکس دہندگان کے اعتماد میں اضافہ ہوا ہے۔ حکام کا کہنا ہے کہ ڈیجیٹل نظام اور نفاذی اقدامات نے ریونیو بڑھانے میں اہم کردار ادا کیا ہے۔

ایف بی آر نے اس عزم کا اظہار کیا ہے کہ وہ رواں مالی سال کے ریونیو اہداف کے حصول کے لیے اصلاحاتی عمل اور نفاذی حکمت عملی کو مزید مؤثر بنائے گا۔