اسپورٹس ڈیپارٹمنٹ پنجاب کی 2026 کی پہلی بڑی سرگرمی، پاکستان کی سب سے بڑی سائیکلنگ ریس کا اعلان

لاہور: اسپورٹس ڈیپارٹمنٹ پنجاب نے سال 2026 کی پہلی بڑی اسپورٹس سرگرمی کے طور پر پاکستان کی سب سے بڑی سائیکلنگ رائیڈ منعقد کرنے کا فیصلہ کر لیا ہے، جو 25 جنوری کو لاہور میں منعقد ہوگی۔

ترجمان اسپورٹس ڈیپارٹمنٹ کے مطابق یہ سائیکلنگ رائیڈ لاہور کی تاریخ کی سب سے بڑی سائیکلنگ سرگرمی ہوگی، جس میں 500 سے زائد سائیکلسٹس کی شرکت یقینی بنائی جائے گی۔

سائیکلنگ رائیڈ کا آغاز منال لبرٹی چوک سے ہوگا اور اختتام پنجاب اسٹیڈیم پر کیا جائے گا۔ رائیڈ کے دوران سیکیورٹی، ٹریفک مینجمنٹ اور شرکاء کی سہولت کے لیے خصوصی انتظامات کیے جا رہے ہیں۔

ترجمان کا کہنا ہے کہ اس ایونٹ کا مقصد صحت مند طرزِ زندگی، ماحول دوست سفری ذرائع کے فروغ اور کھیلوں کی سرگرمیوں کو عام کرنا ہے۔ سائیکلنگ رائیڈ میں پیشہ ور اور شوقیہ سائیکلسٹس دونوں شرکت کر سکیں گے۔

اسپورٹس ڈیپارٹمنٹ کے مطابق رجسٹریشن کا عمل جاری ہے اور تمام سائیکلسٹس کو اس تاریخی ایونٹ میں بھرپور شرکت کی دعوت دی گئی ہے۔