پنجاب میں فلم انڈسٹری کے فروغ کے لیے پنجاب فلم سٹی اتھارٹی تشکیل دینے کا فیصلہ

پنجاب میں فلم انڈسٹری کے احیاء اور فروغ کے لیے صوبائی حکومت نے ’پنجاب فلم سٹی اتھارٹی‘ قائم کرنے کا فیصلہ کیا ہے۔ اس سلسلے میں ’پنجاب فلم سٹی اتھارٹی ایکٹ 2025‘ گزشتہ روز پنجاب اسمبلی میں پیش کر دیا گیا، جس کا مقصد فلم سازی، ڈرامہ نگاری اور دستاویزی فلموں کی سرکاری سطح پر سرپرستی کرنا ہے۔ اس اتھارٹی کے تمام اخراجات اور فلمی صنعت کی ترقی کے لیے فنڈز حکومتِ پنجاب فراہم کرے گی۔

اس نئے قانون کے تحت صوبے میں فلم سازی کے لیے ایک جامع پالیسی، قواعد و ضوابط اور لائسنسنگ کا جدید نظام متعارف کرایا جائے گا۔ فلم سازوں کو درپیش رکاوٹوں کو دور کرنے کے لیے ون ونڈو آپریشن اور خصوصی مراعات دی جائیں گی تاکہ مقامی اور غیر ملکی سرمایہ کاری کو راغب کیا جا سکے۔ اس منصوبے سے جدید فلم اسٹوڈیوز، فلم سٹی اور پوسٹ پروڈکشن کی عالمی معیار کی سہولیات کے قیام کی راہ ہموار ہوگی۔

اتھارٹی نہ صرف نئے ٹیلنٹ کے لیے تربیتی پروگرام شروع کرے گی بلکہ فلم انڈسٹری کے لیے گرانٹس اور سبسڈی کا نظام بھی وضع کرے گی تاکہ پنجاب کی ثقافت اور سیاحت کو عالمی سطح پر اجاگر کیا جا سکے۔ اسمبلی کی کارروائی کے مطابق یہ بل دو ماہ کے لیے متعلقہ کمیٹی کے سپرد کر دیا گیا ہے، جو اپنی رپورٹ پیش کرے گی جس کے بعد اسمبلی سے حتمی منظوری اور گورنر کے دستخط کے ساتھ یہ قانون نافذ العمل ہو جائے گا۔