سوشل میڈیا پر سائبر سکیورٹی سے متعلق نوٹیفکیشن جعلی اور گمراہ کن ہے: پی ٹی اے

پاکستان ٹیلی کمیونیکیشن اتھارٹی (پی ٹی اے) نے سوشل میڈیا پر زیرِ گردش سائبر سکیورٹی سے متعلق ایک نوٹیفکیشن کی حقیقت واضح کرتے ہوئے اسے مکمل طور پر جعلی اور گمراہ کن قرار دے دیا ہے۔ ترجمان پی ٹی اے کے مطابق اتھارٹی کی جانب سے ایسا کوئی الرٹ یا سائبر سکیورٹی وارننگ جاری نہیں کی گئی، لہٰذا عوام ایسے غیر مصدقہ دعووں پر بالکل کان نہ دھریں۔

وائرل ہونے والے اس جعلی نوٹیفکیشن میں دعویٰ کیا گیا تھا کہ کسی مخصوص لینڈ لائن نمبر سے انے والی کال اٹھانے پر محض 5 سے 7 سیکنڈ کے اندر صارف کا موبائل ڈیٹا اور تمام بینک یا دیگر اکاؤنٹس ہیک کیے جا سکتے ہیں۔ پی ٹی اے نے شہریوں سے اپیل کی ہے کہ وہ سوشل میڈیا پر بغیر تصدیق کے پھیلائی جانے والی افواہوں پر یقین نہ کریں اور نہ ہی ان کو آگے شیئر کریں۔ ترجمان نے تاکید کی کہ کسی بھی الرٹ یا معتبر معلومات کے لیے صرف پی ٹی اے کے آفیشل سوشل میڈیا ہینڈلز اور ویب سائٹ سے رجوع کریں۔