پاکستان اور برطانیہ کا دوطرفہ سٹریٹجک شراکت داری مزید مضبوط بنانے کا عزم

برطانیہ میں پاکستان کے ہائی کمشنر ٹیپو عثمان نے برطانوی وزیرِ مملکت برائے مشرقِ وسطیٰ، شمالی افریقہ، افغانستان و پاکستان اسٹیفن ڈاؤٹی سے ملاقات کی ہے، جس میں دوطرفہ تعلقات اور خطے کی تازہ صورتحال پر تفصیلی تبادلہ خیال کیا گیا۔ ملاقات کے دوران دونوں ممالک کے درمیان حالیہ اعلیٰ سطحی روابط اور دوطرفہ تعاون میں مثبت پیش رفت کو سراہا گیا۔ برطانوی وزیر اسٹیفن ڈاؤٹی نے سوشل میڈیا پر اپنے پیغام میں خوشگوار ملاقات کا خیرمقدم کرتے ہوئے بتایا کہ پاکستان اور برطانیہ تجارت، سرمایہ کاری، سکیورٹی اور مائیگریشن جیسے امور پر مل کر کام کر رہے ہیں۔ ملاقات کے اختتام پر دونوں رہنماؤں نے مشترکہ مفادات کے فروغ کے لیے اسٹریٹجک روابط کا تسلسل جاری رکھنے اور علاقائی و بین الاقوامی امور پر قریبی رابطہ برقرار رکھنے کے عزم کا اعادہ کیا۔