پاکستان سٹاک مارکیٹ میں کاروبار کے آغاز پر تیزی کا رجحان

مشرقِ وسطیٰ کی صورتحال میں بہتری اور امریکا ایران جنگ بندی کے مثبت اثرات عالمی مالیاتی منڈیوں پر ظاہر ہونا شروع ہو گئے ہیں، جس کے باعث پاکستان سمیت تمام بڑی ایشیائی سٹاک مارکیٹس میں آج زبردست تیزی دیکھی جا رہی ہے۔ کاروباری ہفتے کے پانچویں اور آخری روز (جمعہ) پاکستان سٹاک ایکسچینج میں کاروبار کا آغاز ہی انتہائی مثبت انداز میں ہوا، جہاں ہنڈرڈ انڈیکس میں 2,000 سے زائد پوائنٹس کا ریکارڈ اضافہ دیکھنے میں آیا۔ اس تیزی کے نتیجے میں انڈیکس 1 لاکھ 67 ہزار 844 کی تاریخی سطح پر پہنچ گیا ہے۔ واضح رہے کہ گزشتہ روز مارکیٹ معمولی مندی کے بعد 1 لاکھ 65 ہزار 517 پوائنٹس پر بند ہوئی تھی۔

پاکستان کے ساتھ ساتھ دیگر ایشیائی منڈیوں میں بھی سرمایہ کاروں کا اعتماد بحال ہوا ہے۔ خبر ایجنسی کے مطابق جاپان کے نکی (Nikkei) انڈیکس میں 2 فیصد کا بڑا اضافہ ریکارڈ کیا گیا ہے، جبکہ تھائی لینڈ، چین اور ہانگ کانگ کی سٹاک مارکیٹس میں بھی ایک فیصد تک کی تیزی دیکھی گئی۔ معاشی ماہرین کا کہنا ہے کہ خطے میں تناؤ کی کمی اور اسلام آباد میں ہونے والے اہم مذاکرات نے سرمایہ کاروں کو مثبت اشارے دیے ہیں، جس سے نہ صرف خام تیل کی قیمتوں میں استحکام کی امید پیدا ہوئی ہے بلکہ عالمی تجارت میں تیزی آنے کے امکانات بھی روشن ہو گئے ہیں۔