گرین لینڈ کی خریداری کا ممکنہ امریکی منصوبہ سامنے آگیا

گرین لینڈ سے متعلق امریکا کے ممکنہ منصوبے کی تفصیلات سامنے آ گئی ہیں، جس کے تحت جزیرے کی مقامی آبادی کو براہ راست مالی ترغیب دینے پر غور کیا جا رہا ہے۔

خبر ایجنسی کے مطابق گرین لینڈ کی تقریباً 57 ہزار آبادی کو 10 ہزار سے ایک لاکھ ڈالر تک فی کس ادائیگی کی تجویز زیرِ غور ہے۔ امریکی صدر کے معاونین اور حکام کے حوالے سے دعویٰ کیا گیا ہے کہ اس منصوبے کا مقصد گرین لینڈ کے باشندوں کو ڈنمارک سے علیحدگی پر آمادہ کرنا اور امریکا میں شمولیت کے لیے قائل کرنا ہے۔دوسری جانب گرین لینڈ سے متعلق امریکی عزائم پر برطانیہ اور متعدد یورپی ممالک نے شدید ردعمل کا اظہار کیا ہے اور اسے خطے کے استحکام کے لیے خطرہ قرار دیا ہے۔

واضح رہے کہ سابق امریکی صدر ڈونلڈ ٹرمپ نے گزشتہ ماہ ایک بیان میں کہا تھا کہ امریکا کو گرین لینڈ کی ضرورت ہے، نہ صرف معدنی وسائل بلکہ دفاعی اہمیت کے باعث بھی گرین لینڈ امریکا کے لیے انتہائی اہم ہے۔