چیف الیکشن کمشنر کی تقرری: وزیرقانون اعظم نذیرتارڑ کی اپوزیشن کو مذاکرات کی پیشکش

اسلام آباد: وفاقی وزیر قانون اعظم نذیر تارڑ نے کہا ہے کہ حکومت چیف الیکشن کمشنر کی تقرری کے معاملے پر اپوزیشن کو مسلسل مذاکرات کی دعوت دے رہی ہے تاکہ آئینی عمل کو اتفاق رائے سے مکمل کیا جا سکے۔

انہوں نے کہا کہ وزیر اعظم کے ساتھ بیٹھ کر اس اہم آئینی تقرری پر بات چیت کی پیشکش کی جا رہی ہے، تاہم اپوزیشن کی جانب سے سنجیدہ ردعمل سامنے نہیں آ رہا۔

وفاقی وزیر نے کہا کہ حکومت اس عمل کو آگے بڑھانے کے لیے تیار ہے لیکن اپوزیشن کی عدم دلچسپی کے باعث پیش رفت سست روی کا شکار ہے۔

انہوں نے کہا کہ بعض سیاسی جماعتیں عدالتی معاملات کو سیاسی رنگ دے رہی ہیں جبکہ بانی چیئرمین سے ملاقات کا معاملہ آئینی اور عدالتی طریقہ کار کے تحت طے شدہ ہے۔

اعظم نذیر تارڑ کے مطابق حکومت پر لگائے جانے والے کئی الزامات بے بنیاد ہیں جبکہ گلگت بلتستان کے انتخابات سمیت مختلف معاملات پر سیاسی تنقید کی جا رہی ہے۔

انہوں نے کہا کہ حکومت اور صوبوں کے درمیان مالی معاملات میں توازن برقرار رکھنے کی کوشش کی جا رہی ہے اور قانون کے مطابق تمام فیصلے کیے جا رہے ہیں۔