2 فروری سے ملک بھر میں پہلی انسداد پولیو مہم کا آغاز: عائشہ رضا فاروق

اسلام آباد میں وزیراعظم کی فوکل پرسن برائے انسداد پولیو عائشہ رضا فاروق نے کہا ہے کہ 2 فروری سے ملک بھر میں پہلی انسداد پولیو مہم کا آغاز کیا جا رہا ہے۔

انہوں نے پریس کانفرنس میں بتایا کہ اس مہم کے دوران ساڑھے چار کروڑ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ اس مہم میں 4 لاکھ سے زائد پولیو ورکرز حصہ لیں گے جو گھر گھر جا کر بچوں کو قطرے پلائیں گے۔

عائشہ رضا فاروق نے کہا کہ پاکستان میں پولیو کا مکمل خاتمہ میڈیا کے تعاون کے بغیر ممکن نہیں، جبکہ غلط معلومات پھیلانا آج کے دور میں انتہائی آسان ہو چکا ہے، جس سے پولیو مہم کو چیلنجز کا سامنا ہے۔

انہوں نے مزید بتایا کہ سال 2025 کے دوران اب تک پولیو کے 31 کیسز سامنے آ چکے ہیں، جن میں سے 17 کیسز جنوبی خیبرپختونخوا سے رپورٹ ہوئے ہیں۔ کراچی میں پولیو وائرس موجود ہے، جبکہ بلوچستان میں گزشتہ 15 ماہ کے دوران پولیو کا کوئی کیس سامنے نہیں آیا۔ لاہور میں ماحولیاتی نمونوں میں وائرس کی مقدار میں نمایاں کمی دیکھی گئی۔

فوکل پرسن نے کہا کہ وزیراعظم آفس پولیو کے خاتمے کے لیے مکمل نگرانی کر رہا ہے اور تمام صوبوں کے چیف سیکرٹریز 2 فروری سے قبل انسداد پولیو مہم کے حوالے سے اجلاس کر رہے ہیں۔ پولیو قطروں سے انکاری خاندانوں کو راضی کرنا وقت کی اہم ضرورت ہے تاکہ پاکستان کو پولیو فری ملک بنایا جا سکے۔