مودی سرکار کے اقدامات نے بھارتی ریاستی جبر میں اضافہ کیا: وزیراعظم

وزیراعظم محمد شہباز شریف نے ’یومِ استحصالِ کشمیر‘ کے موقع پر اپنے پیغام میں کشمیری بھائیوں اور بہنوں کے ساتھ پاکستان کی جانب سے غیر متزلزل یکجہتی کا اظہار کیا ہے۔ انہوں نے کہا کہ ۵ اگست ۲۰۱۹ء کے بھارتی اقدامات نے مقبوضہ وادی میں ریاستی جبر میں مزید اضافہ کیا، لیکن تمام تر مظالم اور مشکلات کے باوجود کشمیری عوام کا حوصلہ اور استقامت آج بھی چٹان کی طرح مضبوط ہے۔ وزیراعظم نے واضح کیا کہ جموں و کشمیر کا تنازع جنوبی ایشیا میں امن و استحکام کے لیے سب سے بنیادی اور دیرینہ مسئلہ ہے، جو یکطرفہ اقدامات یا طاقت کے استعمال سے نہیں بلکہ اقوامِ متحدہ کی قراردادوں کے مطابق منصفانہ حل سے ہی ممکن ہے۔ انہوں نے عالمی برادری پر زور دیا کہ وہ محض تشویش کے اظہار سے آگے بڑھ کر ذمہ دارانہ کردار ادا کرے، اور اعادہ کیا کہ پاکستان ہر عالمی فورم پر کشمیریوں کی سیاسی، اخلاقی اور سفارتی حمایت جاری رکھے گا۔