وزیراعظم شہباز شریف کا غزہ امن منصوبے کا خیرمقدم، فلسطینی ریاست کے قیام پر زور

وزیراعظم شہباز شریف نے غزہ امن منصوبے کے تحت غیر مسلح ہونے کے فریم ورک پر عمل درآمد کا خیرمقدم کرتے ہوئے اسے ایک انتہائی مثبت پیش رفت قرار دیا ہے۔ سوشل میڈیا پلیٹ فارم ‘ایکس’ (X) پر جاری کردہ اپنے پیغام میں وزیراعظم نے بورڈ آف پیس کی نگرانی میں ہونے والے اقدامات کا خیرمقدم کیا اور اس اہم کامیابی پر امریکہ، مصر، قطر اور ترکیہ کی سفارتی کاوشوں کو سراہا۔ وزیراعظم شہباز شریف نے امریکی صدر ڈونلڈ ٹرمپ کی جرات مندانہ قیادت کی تعریف کرتے ہوئے امید ظاہر کی کہ امن منصوبے کے تمام وعدوں پر عمل درآمد کے لیے ٹھوس اقدامات کیے جائیں گے۔ انہوں نے اس عزم کا اعادہ بھی کیا کہ یہ کوششیں فلسطینی عوام کے حقِ خودارادیت کے حصول کی راہ ہموار کریں گی اور ایک مقررہ مدت کے سیاسی عمل کے نتیجے میں آزاد، خودمختار اور جغرافیائی طور پر متصل فلسطینی ریاست قائم ہوگی۔