شہباز شریف سے ایرانی وفد کی ملاقات، تجارت، کان کنی میں تعاون بڑھانے پر اتفاق

وزیراعظم محمد شہباز شریف سے اسلامی جمہوریہ ایران کے وزیر صنعت، کان کنی و تجارت سید محمد اتابک کی سربراہی میں 6 رکنی اعلیٰ سطح وفد نے اسلام آباد میں اہم ملاقات کی۔ ملاقات کے دوران وزیراعظم نے کہا کہ پاکستان اپنے برادر ہمسایہ ملک ایران کے ساتھ تعلقات کو انتہائی قدر کی نگاہ سے دیکھتا ہے اور خطے میں پائیدار امن و استحکام کے لیے اپنی مخلصانہ سفارتی کوششیں جاری رکھے گا۔ انہوں نے ایرانی صدر ڈاکٹر مسعود پزشکیان کے ساتھ ہونے والی حالیہ گفتگو کا حوالہ دیتے ہوئے امید ظاہر کی کہ دونوں ممالک مسلسل کوششوں کے ذریعے باہمی قیادت کے طے کردہ 10 ارب ڈالر کے سالانہ تجارتی ہدف کو جلد حاصل کر لیں گے۔

ملاقات میں پاکستان اور ایران کے درمیان سرحدی تجارت کو فروغ دینے، 24 گھنٹے بارڈر کھولنے کی سہولیات کی فراہمی، لاجسٹکس کو بہتر بنانے اور کسٹمز طریقہ کار میں ہم آہنگی لانے پر مکمل اتفاق کیا گیا۔ اس کے علاوہ کان کنی بالخصوص قیمتی پتھروں کی پراسیسنگ اور ویلیو ایڈیشن کے شعبے میں تعاون بڑھانے پر بھی پیش رفت ہوئی۔

وزیراعظم شہباز شریف نے ایران کے سپریم لیڈر آیت اللہ سید مجتبیٰ حسینی خامنہ ای اور صدر مسعود پزشکیان کے لیے نیک تمناؤں کا پیغام بھیجا۔ ایرانی وزیر سید محمد اتابک نے شاندار میزبانی پر پاکستان کا شکریہ ادا کرتے ہوئے کہا کہ تہران پاکستان کے ساتھ آزاد تجارتی معاہدے (FTA) کے لیے تکنیکی مذاکرات سمیت اقتصادی تعلقات کو مزید وسیع کرنے کا خواش مند ہے۔