وزیراعظم اور ایرانی صدر کی پریس کانفرنس، مشترکہ امن کوششوں کا اعادہ

اسلام آباد میں وزیراعظم شہباز شریف اور ایرانی صدر ڈاکٹر مسعود پزشکیان نے ایک مشترکہ پریس کانفرنس سے خطاب کرتے ہوئے پاک ایران تعلقات، خطے میں امن اور باہمی تعاون کو مزید مضبوط بنانے کے عزم کا اعادہ کیا ہے۔ وزیراعظم شہباز شریف نے اپنے خطاب کا آغاز فارسی زبان اور ایک خوبصورت شعر سے کیا، جس پر ایرانی صدر اور ان کے وفد نے تالیاں بجا کر بھرپور پذیرائی کی۔ وزیراعظم نے ایران کے ساتھ گہری دوستی کا ذکر کرتے ہوئے کہا کہ “دوست وہی ہوتا ہے جو مشکل وقت میں ہاتھ تھامے”۔ انہوں نے ایرانی صدر کے دورے کو باعثِ مسرت قرار دیا اور اسلام آباد مفاہمتی یادداشت پر بطور ثالث پاکستان کے کردار کا ذکر کیا۔ شہباز شریف نے ایرانی سپریم لیڈر مجتبیٰ خامنہ ای کی قیادت کو سراہتے ہوئے ایران اور امریکا کے درمیان جنگ کے خاتمے پر خوشی کا اظہار کیا، تاہم قیمتی جانوں کے ضیاع پر افسوس بھی جتایا۔ انہوں نے واضح کیا کہ پاکستان اور ایران ہزاروں سالہ تہذیبی رشتوں میں بندھے ہیں اور شرپسند عناصر امن معاہدے کو نقصان پہنچانا چاہتے ہیں۔

دوسری جانب، ایرانی صدر ڈاکٹر مسعود پزشکیان نے شاندار میزبانی پر پاکستان کا شکریہ ادا کیا اور اپنی تقریر کا آغاز مفکرِ پاکستان علامہ اقبالؒ کے شعر سے کیا۔ انہوں نے پاکستان کو صرف ہمسایہ نہیں بلکہ بھائی قرار دیتے ہوئے کہا کہ دونوں ممالک “یک جان، دو قالب” ہیں۔ ایرانی صدر کا کہنا تھا کہ تہران اور اسلام آباد کے تعلقات باہمی اعتماد پر مبنی ہیں اور حالیہ واقعات نے ان روابط کو نئی جہت دی ہے۔ انہوں نے اسلام آباد مفاہمتی یادداشت پر دستخط کو پاکستان پر اعتماد کا مظہر قرار دیتے ہوئے صدرِ مملکت، وزیراعظم شہباز شریف اور فیلڈ مارشل سید عاصم منیر کے ساتھ ہونے والی ملاقاتوں کو انتہائی تعمیری اور کامیاب قرار دیا۔