پی سی بی نے بنگلادیش کے بھارت نہ جانے کے موقف کی حمایت کر دی

لاہور: پاکستان کرکٹ بورڈ (پی سی بی) نے بنگلادیش کے ورلڈ کپ میں بھارت نہ جانے کے مؤقف کی حمایت کرتے ہوئے آئی سی سی کو خط لکھ دیا۔ ذرائع کے مطابق خط میں پی سی بی نے واضح کیا کہ تمام صورتحال میں بنگلادیش کے فیصلے کی مکمل حمایت کی جاتی ہے۔

پی سی بی نے آئی سی سی بورڈ ممبرز کو بھی خط کی کاپی بھیجی اور تجویز دی کہ بنگلادیش کے میچز پاکستان میں کرائے جائیں۔ ساتھ ہی پی سی بی نے بنگلادیش کی وجہ سے ورلڈ کپ میں شرکت کے فیصلے پر نظرثانی کا بھی کہا ہے۔

ذرائع کے مطابق آئی سی سی نے اس معاملے پر آج بورڈ میٹنگ طلب کی ہے، جس میں بنگلادیش کے بھارت نہ جانے کے معاملے پر بات ہوگی۔ آئی سی سی کی جانب سے بنگلادیش کے میچز کا وینیو تبدیل کرنے کا امکان کم ہی ہے۔