ملک میں مہنگائی کی رفتار میں اضافہ، سالانہ شرح 11.92 فیصد تک پہنچ گئی

مالی سال 2026-27 کے دوسرے ماہ ستمبر کے تیسرے ہفتے میں ملک کے اندر مہنگائی کی شرح میں مسلسل اضافے کا رجحان برقرار رہا، اور ہفتہ وار بنیادوں پر حساس قیمتوں کے اشاریئے (SPI) میں 0.99 فیصد کا مزید اضافہ ریکارڈ کیا گیا ہے۔ وفاقی ادارہ شماریات (PBS) کی جاری کردہ تازہ ترین رپورٹ کے مطابق سالانہ بنیادوں پر مہنگائی کی شرح 10.64 فیصد سے بڑھ کر 11.92 فیصد کی سطح پر پہنچ گئی ہے۔ زیرِ جائزہ ہفتے کے دوران کل 51 ضروری اشیائے خوردونوش و خدمات میں سے 20 اشیاء کی قیمتوں میں اضافہ، 10 اشیاء کی قیمتوں میں کمی جبکہ 21 اشیاء کی قیمتیں مستحکم رہیں۔

ادارہ شماریات کے اعداد و شمار کے مطابق ایک ہفتے کے دوران بجلی کی قیمتوں میں 18.76 فیصد کا نمایاں اضافہ ہوا، جبکہ انڈے 2.02 فیصد، لہسن 1.57 فیصد، ایل پی جی 1.55 فیصد اور دال مسور 0.75 فیصد مہنگی ہوئی۔ اس کے علاوہ چکن، دودھ، دہی، گوشت اور آٹے کی قیمتوں میں بھی معمولی اضافہ ریکارڈ کیا گیا۔ دوسری جانب ٹماٹر کی قیمت میں 13.45 فیصد، آلو 8.33 فیصد، کیلے 5.66 فیصد، پیاز 2.42 فیصد، جبکہ پیٹرول کی قیمت میں 0.34 فیصد اور ہائی اسپیڈ ڈیزل میں 1.57 فیصد کی کمی دیکھی گئی۔ سالانہ بنیادوں پر 44 ہزار 176 روپے سے زائد ماہانہ آمدنی والے طبقے کے لیے مہنگائی کا تناسب سب سے زیادہ یعنی 12.31 فیصد رہا۔