روپے کی قدر میں بہتری، انٹربینک میں ڈالر مزید سستا ہوگیا

پاکستان کی انٹربینک کرنسی مارکیٹ میں امریکی ڈالر کے مقابلے میں پاکستانی روپیہ پیش قدمی برقرار رکھے ہوئے ہے، جس کے نتیجے میں ڈالر مزید سستا ہو گیا ہے۔ کاروباری ہفتے کے تیسرے روز انٹربینک مارکیٹ میں ٹریڈنگ کے دوران امریکی ڈالر کی قدر میں 3 پیسے کی معمولی کمی ریکارڈ کی گئی۔ اس کمی کے ساتھ انٹربینک میں ڈالر 277 روپے 30 پیسے سے گھٹ کر 277 روپے 27 پیسے کی سطح پر بند ہوا۔

مالیاتی ماہرین کے مطابق غیر ملکی زرمبادلہ کے ذخائر میں استحکام اور درآمدی ادائیگیوں کا تعطل ختم ہونے سے روپے کی قدر کو سہارا مل رہا ہے۔ واضح رہے کہ گزشتہ کاروباری دن کے اختتام پر بھی انٹربینک مارکیٹ میں ڈالر 277 روپے 30 پیسے پر بند ہوا تھا، جس کے بعد مسلسل تدریجی کمی کا یہ سلسلہ معاشی بالخصوص کاروباری طبقے کے لیے مثبت اشارہ قرار دیا جا رہا ہے۔