امریکا میں تاریخ رقم، پہلی بار دو پاکستانی مسلمان میئر اور ڈپٹی میئر منتخب

امریکا کی ریاست میساچوسٹس کے شہر کیمبرج میں تاریخ رقم ہوگئی جہاں پہلی بار میئر اور ڈپٹی میئر دونوں عہدوں پر پاکستانی مسلمان نوجوان منتخب ہوئے ہیں۔
5 جنوری کو ہونے والے انتخاب میں کراچی سے تعلق رکھنے والی سنبل صدیقی سال 2027-26 کے لیے تیسری بار کیمبرج سٹی کی میئر منتخب ہوئیں جبکہ پنجاب کے شہر بورے والا سے تعلق رکھنے والے برہان عظیم کیمبرج سٹی کے کم عمر ترین ڈپٹی میئر منتخب قرار پائے۔
سنبل صدیقی پیشے کے اعتبار سے وکیل ہیں اور امریکی سیاست میں فعال کردار ادا کر رہی ہیں۔ وہ پہلی بار 2017 میں کیمبرج سٹی کونسل کے لیے منتخب ہوئیں جبکہ 2020 سے 2024 تک دو بار میئر کے فرائض انجام دے چکی ہیں۔ سنبل صدیقی ریاست میساچوسٹس کی تاریخ میں کیمبرج کی پہلی مسلمان میئر اور پہلی ایشیائی خاتون ہیں جو مسلسل تیسری بار اس منصب پر منتخب ہوئیں۔
دوسری جانب برہان عظیم، پروفیسر منیر چوہدری کے صاحبزادے ہیں اور ایم آئی ٹی یونیورسٹی بوسٹن سے انجینیئر ہیں۔ وہ اس سے قبل کیمبرج سٹی کے کم عمر ترین کونسلر منتخب ہوچکے ہیں اور اب دوسری بار کونسلر بننے کے بعد کم عمر ترین ڈپٹی میئر منتخب ہوئے ہیں۔