پاکستانی کرکٹرز کے ساتھ مبینہ 2 ارب روپے کا بڑا فراڈ، انکشاف

لاہور: پاکستان کے سابق اور موجودہ کرکٹرز کے ساتھ بڑے پیمانے پر مبینہ مالی فراڈ کا انکشاف سامنے آیا ہے، جس میں 10 سے زائد پاکستانی کرکٹرز کے تقریباً 2 ارب روپے ڈوبنے کا خدشہ ظاہر کیا جا رہا ہے۔

ذرائع کے مطابق کرکٹرز نے ایک کاروباری شخص کے ساتھ سرمایہ کاری کی، جو اس وقت امریکا میں مقیم ہے۔ مبینہ طور پر اس شخص نے کرکٹرز کو غیر معمولی اور ڈبل منافع کا جھانسہ دے کر کروڑوں روپے وصول کیے۔

ذرائع کا کہنا ہے کہ روٹی گروپ کے تقریباً 35 سے 40 کروڑ روپے اس سرمایہ کاری میں پھنس چکے ہیں، جبکہ ایک معروف کرکٹر کے اکیلے 40 کروڑ روپے بھی ڈوبنے کی اطلاعات ہیں۔ اس کے علاوہ متعدد دیگر کرکٹرز نے بھی براہِ راست سرمایہ کاری کی تھی۔

ذرائع کے مطابق کرکٹرز نے مبینہ فراڈ کے حوالے سے ابھی تک کسی قانونی یا سرکاری پلیٹ فارم پر باضابطہ شکایت درج نہیں کرائی، نہ ہی اس معاملے پر پاکستان کرکٹ بورڈ (پی سی بی) سے رابطہ کیا گیا ہے۔

یہ بھی انکشاف ہوا ہے کہ بعض کرکٹرز نے سابق کپتان کی دیکھا دیکھی میں اس کاروباری شخص کے ساتھ سرمایہ کاری کی، جبکہ موجودہ کرکٹرز میں سابق اور موجودہ کپتانوں کے نام بھی شامل بتائے جا رہے ہیں۔

ذرائع کا کہنا ہے کہ امریکا میں مقیم یہ شخص ابتدا میں کرکٹرز کو ہر ماہ باقاعدگی سے منافع ادا کرتا رہا، جس کے باعث مزید سرمایہ کاری کی گئی، تاہم اب اس کا فون بند ہے اور رابطہ منقطع ہو چکا ہے۔

ذرائع کے مطابق ایک مشہور کرکٹ ایجنٹ بھی اس مبینہ فراڈ میں اپنی خطیر رقم سے ہاتھ دھو بیٹھا ہے۔ متاثرہ کرکٹرز کا دعویٰ ہے کہ انہیں یقین دہانی کرائی گئی تھی کہ سرمایہ محفوظ اور منافع یقینی ہے، تاہم اب صورتحال یکسر مختلف ہے۔

ابھی تک کسی کرکٹر نے اس معاملے پر کھل کر مؤقف اختیار نہیں کیا، تاہم اندرونی سطح پر قانونی مشاورت شروع کیے جانے کی اطلاعات ہیں۔