پاکستان ویمن نے زمبابوے ویمن کو ٹی 20 سیریز میں کلین سوئپ شکست دیدی

پاکستان ویمن کرکٹ ٹیم نے تیسرے اور آخری ٹی20 میچ میں زمبابوے ویمن کرکٹ ٹیم کو 133 رنز سے شکست دے کر سیریز میں کلین سوئپ مکمل کرلیا۔

کراچی میں کھیلے گئے میچ میں زمبابوے کی ٹیم 224 رنز کے ہدف کے تعاقب میں 18 اوورز میں 90 رنز پر ڈھیر ہوگئی۔

زمبابوے کی جانب سے کیلس نے 32 اور زیمونو نے 18 رنز بنائے۔ پاکستان کی سعدیہ اقبال نے 3 وکٹیں جبکہ نشرہ سندھو نے 2 وکٹیں حاصل کیں۔ طوبیٰ حسن، رامین شمیم اور فاطمہ ثناء نے 1،1 وکٹ حاصل کی۔

اس سے قبل پاکستان ویمن ٹیم نے مقررہ 20 اوورز میں 4 وکٹوں کے نقصان پر 223 رنز اسکور کیے تھے۔

قومی ٹیم کی کپتان فاطمہ ثناء نے شاندار بیٹنگ کرتے ہوئے صرف 15 گیندوں پر نصف سنچری مکمل کی اور ٹی20 فارمیٹ میں نیا عالمی ریکارڈ قائم کیا۔