امریکی ناظم الامور نٹالی بیکر کی وزیرِ خزانہ محمد اورنگزیب سے ملاقات، تجارت و سرمایہ کاری بڑھانے پر اتفاق

اسلام آباد: وفاقی وزیرِ خزانہ سینیٹر محمد اورنگزیب سے امریکی ناظم الامور نٹالی بیکر نے ملاقات کی، جس میں پاکستان کی معاشی صورتحال، اصلاحاتی عمل اور دوطرفہ اقتصادی تعاون پر تفصیلی تبادلۂ خیال کیا گیا۔

ملاقات کے دوران نٹالی بیکر نے پاکستان میں معاشی استحکام اور اقتصادی بہتری کی تعریف کی اور حکومت کے اصلاحاتی عمل اور میکرو اکنامک ایجنڈے کو سراہا۔ انہوں نے کہا کہ پاکستان درست سمت میں آگے بڑھ رہا ہے اور عالمی سرمایہ کاروں کے لیے نئے مواقع پیدا ہو رہے ہیں۔

امریکی ناظم الامور نے پاکستان کے ساتھ تجارت اور سرمایہ کاری کے فروغ کے لیے امریکا کی مکمل حمایت کا اعادہ کیا اور دوطرفہ اقتصادی تعلقات کو مزید مضبوط بنانے کی خواہش کا اظہار کیا۔

اس موقع پر وزارتِ خزانہ پاکستان اور امریکی کمپنی لبرٹی فنانشل کے درمیان کرپٹو کرنسی تعاون کے معاہدے کا بھی خیرمقدم کیا گیا، جسے جدید مالیاتی شعبے میں ایک اہم پیش رفت قرار دیا گیا۔

وفاقی وزیرِ خزانہ سینیٹر محمد اورنگزیب نے کہا کہ حکومت معاشی اصلاحات کے تسلسل اور سرمایہ کار دوست ماحول کی فراہمی کے لیے پرعزم ہے۔ انہوں نے یقین دلایا کہ پاکستان میں سرمایہ کاری کے لیے سازگار پالیسیوں پر عملدرآمد جاری رکھا جائے گا تاکہ مقامی اور غیر ملکی سرمایہ کاروں کو اعتماد مل سکے۔