پاکستان سٹاک ایکسچینج: کاروباری ہفتے میں منفی رجحان رہا

کراچی: پاکستان سٹاک ایکسچینج (PSX) میں گذشتہ کاروباری ہفتے کے دوران شدید مندی کا رجحان غالب رہا، جس کے نتیجے میں کے ایس ای 100 انڈیکس میں ہزاروں پوائنٹس کی نمایاں کمی ریکارڈ کی گئی ہے۔

ہفتہ وار رپورٹ کے مطابق کاروباری ہفتے کے اختتام پر 100 انڈیکس 2,367 پوائنٹس کی کمی کے ساتھ 1,75,328 کی سطح پر بند ہوا۔ پورے ہفتے کے دوران مارکیٹ میں اتار چڑھاؤ دیکھا گیا اور انڈیکس 3,623 پوائنٹس کے بینڈ میں رہا، جہاں اس نے 1,78,138 پوائنٹس کی ہفتہ وار بلند ترین جبکہ 1,74,515 پوائنٹس کی کم ترین سطح کو چھوا۔

رپورٹ کے مطابق اس ایک ہفتے کے دوران حصص بازار میں مجموعی طور پر 3.8 ارب شیئرز کے سودے طے پائے، جن کی مجموعی مالیت 166 ارب روپے رہی۔ مارکیٹ میں مندی کے اس رجحان کے باعث پاکستان سٹاک ایکسچینج کی مجموعی مارکیٹ کیپٹلائزیشن 256 ارب روپے کے بڑے خسارے سے کم ہو کر 19,629 ارب روپے پر آ گئی ہے۔