سٹاک مارکیٹ میں شدید مندی، کاروبار کا منفی رجحان رہا

کراچی: پاکستان اسٹاک ایکسچینج (PSX) میں ہفتے کے پہلے کاروباری روز شدید مندی کا رجحان غالب رہا، جس کے باعث 100 انڈیکس ایک لاکھ 74 ہزار پوائنٹس کی اہم نفسیاتی حد برقرار رکھنے میں ناکام رہا۔

ٹریڈنگ کے آغاز سے ہی مارکیٹ میں پرافٹ ٹیکنگ اور فروخت کے شدید دباؤ کے باعث منفی رجحان دیکھا گیا جو کاروباری روز کے اختتام تک برقرار رہا۔ دن بھر کے اتار چڑھاؤ کے بعد کے ایس ای 100 انڈیکس 1,692.68 پوائنٹس یا 0.97 فیصد کمی کے ساتھ 1,73,636.00 پوائنٹس کی سطح پر بند ہوا۔

واضح رہے کہ گزشتہ کاروباری ہفتے کے اختتام پر اسٹاک مارکیٹ میں ہنڈرڈ انڈیکس 1,75,328.68 پوائنٹس کی سطح پر بند ہوا تھا، تاہم نئی پیش رفت کے بعد سرمایہ کاروں کے اربوں روپے ڈوب گئے اور مارکیٹ کیپٹلائزیشن میں نمایاں کمی ریکارڈ کی گئی۔