کراچی: پاکستان اسٹاک ایکسچینج میں تجارت کا تیزی پر اختتام

پاکستان اسٹاک ایکسچینج (PSX) میں کاروباری ہفتے کے دوران زبردست تیزی کا رجحان برقرار رہا، جہاں ۱۰۰ انڈیکس ۱۰۲۱ پوائنٹس کی نمایاں پیشرفت کے بعد ۱۶۹,۰۴۳ کی بلند سطح پر بند ہو گیا۔ ٹریڈنگ کے دوران مارکیٹ میں سرمایاکاروں کی جانب سے خریدارانہ رجحان غالب رہا، جس کے نتیجے میں ۱۰۰ انڈیکس کی یومیہ بلند ترین سطح ۱۶۹,۵۷۶ پوائنٹس ریکارڈ کی گئی، جبکہ دن بھر میں انڈیکس کی کم ترین سطح ۱۶۸,۲۲۳ پوائنٹس رہی۔

مارکیٹ میں تجارتی سرگرمیوں کا حجم بھی کافی بہتر رہا اور دن بھر کے دوران ۲۰ ارب ۹ کروڑ روپے مالیت کے ۳۸ کروڑ ۶۴ لاکھ شیئرز کے سودے کیے گئے۔ اسٹاک ایکسچینج میں مجموعی طور پر ۵۷۱ کمپنیوں نے حصہ لیا، جن میں سے ۲۹۶ کمپنیوں کے شیئرز کی قیمتوں میں اضافہ دیکھا گیا جبکہ ۱۵۲ کمپنیوں کے شیئرز کی قیمتوں میں کمی ریکارڈ کی گئی۔

معاشی ماہرین کے مطابق ایکسچینج میں مثبت کاروباری فضا اور خریداروں کے اعتماد کی بحالی سے مارکیٹ میں تیزی کا مسلسل سفر جاری ہے۔ تجارتی حجم اور شیئرز کی قیمتوں میں بہتری نے حصص بازار کو نئے ریکارڈز قائم کرنے میں مدد فراہم کی ہے۔