پاکستان سٹاک مارکیٹ میں کاروبار کے آغاز پر شدید مندی

کراچی: پاکستان سٹاک مارکیٹ میں جاری منفی رجحان کے باعث کاروباری ہفتے کے تیسرے روز شدید مندی دیکھنے میں آئی ہے، جہاں کے ایس ای 100 انڈیکس (KSE-100 Index) میں 1700 سے زائد پوائنٹس کی بڑی کمی ریکارڈ کی گئی۔

کاروبار کے آغاز ہی سے مارکیٹ میں شدید فروخت کا دباؤ دیکھنے میں آیا، جس کے نتیجے میں انڈیکس گراوٹ کا شکار ہو کر ایک لاکھ 74 ہزار 701 پوائنٹس کی سطح پر آ گیا۔ سرمایہ کاروں کی جانب سے منافع بخش حصص کی فروخت کے باعث مارکیٹ میں مندی کا رجحان غالب رہا۔

واضح رہے کہ گزشتہ کاروباری روز کے اختتام پر بھی سٹاک ایکسچینج میں 508 پوائنٹس کی کمی ریکارڈ کی گئی تھی اور ہنڈرڈ انڈیکس ایک لاکھ 76 ہزار 466 پوائنٹس کی سطح پر بند ہوا تھا۔ معاشی ماہرین کے مطابق موجودہ مندی کی بنیادی وجہ علاقائی صورتحال، سرمائے کا انخلاء اور تکنیکی تصحیح (Technical Correction) کی لہر ہے۔