سٹاک مارکیٹ میں اتار چڑھاؤ، ہنڈرڈ انڈیکس مثبت زون میں بند ہوا

پاکستان اسٹاک ایکسچینج (PSX) میں کاروباری ہفتے کے دوسرے روز اگرچہ اتار چڑھاؤ اور ملا جلا رجحان جاری رہا، تاہم بازارِ حصص کا اختتام بالآخر مثبت زون میں ہوا۔

کاروبار کا آغاز مثبت انداز میں ہوا اور ٹریڈنگ کے دوران 100 انڈیکس میں 500 سے زائد پوائنٹس کا شاندار اضافہ دیکھا گیا جس سے انڈیکس ایک لاکھ 71 ہزار پوائنٹس کی حد عبور کر گیا۔ تاہم دن بھر کے سیشن میں مارکیٹ میں اتار چڑھاؤ بھی دیکھنے کو ملا، اور کاروباری روز کے اختتام پر 100 انڈیکس 266 پوائنٹس کے اضافے کے ساتھ ایک لاکھ 70 ہزار 765 پوائنٹس کی سطح پر بند ہوا۔

آج کے کاروباری سیشن کے دوران سرمایہ کاروں کی سرگرمیوں کے نتیجے میں 12 ارب 4 کروڑ 45 لاکھ 53 ہزار 12 روپے مالیت کے مجموعی طور پر 21 کروڑ 24 لاکھ 59 ہزار 915 شیئرز کا لین دین ہوا۔ یاد رہے کہ گزشتہ کاروباری دن کے اختتام پر پاکستان اسٹاک ایکسچینج میں 100 انڈیکس ایک لاکھ 70 ہزار 498 پوائنٹس کی سطح پر بند ہوا تھا۔