سٹاک مارکیٹ میں مندی، انڈیکس ایک لاکھ 73 ہزار پوائنٹس کی حد کھو بیٹھا

کراچی: پاکستان سٹاک مارکیٹ میں ہفتے کے دوسرے کاروباری روز بھی شدید مندی کا رجحان غالب رہا، جس کے باعث سرمایہ کاروں کو اربوں روپے کا نقصان برداشت کرنا پڑا۔

کاروبار کے آغاز ہی سے مارکیٹ میں فروخت کا دباؤ دیکھا گیا، جس سے کے ایس ای 100 انڈیکس میں ابتدائی طور پر 100 سے زائد پوائنٹس کی کمی ریکارڈ کی گئی اور انڈیکس 1,73,377 کی سطح پر آگیا۔ ٹریڈنگ کے اختتام تک مندی کا یہ سلسلہ جاری رہا اور کے ایس ای 100 انڈیکس مجموعی طور پر 993.41 پوائنٹس (0.57 فیصد) کی کمی کے ساتھ 1,72,642.84 کی سطح پر بند ہوا۔

واضح رہے کہ اس سے قبل گزشتہ کاروباری دن کے اختتام پر بھی سٹاک مارکیٹ میں 1,692 پوائنٹس کی بڑی کمی ریکارڈ کی گئی تھی اور انڈیکس 1,73,636 کی سطح پر بند ہوا تھا۔ معاشی تجزیہ کاروں کے مطابق مسلسل دو روز کی اس مندی کی وجہ عالمی منڈی میں معاشی عدم استحکام اور خریداروں کی محتاط حکمتِ عملی ہے۔