سرکاری ملکیتی اداروں کو 6 ماہ میں 342 ارب 80 کروڑ روپے کا نقصان

وفاقی وزیرِ خزانہ کی زیرِ صدارت کابینہ کمیٹی برائے سرکاری ملکیتی اداروں (SOEs) کا اجلاس منعقد ہوا، جس میں مالی سال 2025 کے نصفِ اول (جولائی تا دسمبر 2025) کے دوران سرکاری اداروں کی مالی کارکردگی کا تفصیلی جائزہ لیا گیا۔ وزارتِ خزانہ کے مطابق اس عرصے میں خسارے میں جانے والے ملکیتی اداروں کا مجموعی خسارہ 342 ارب 80 کروڑ روپے ریکارڈ کیا گیا، جبکہ منافع بخش سرکاری اداروں نے 423 ارب 30 کروڑ روپے کا منافع کمایا۔ اس طرح تمام سرکاری اداروں نے مجموعی طور پر حکومت کو 35 ارب روپے کا خالص مالی منافع فراہم کیا۔

اجلاس میں بتایا گیا کہ حکومت نے اس عرصے کے دوران ایس او ایز کو 804 ارب روپے کی مالی معاونت فراہم کی، جبکہ ان اداروں کی جانب سے خزانے کو 839 ارب روپے موصول ہوئے۔ کابینہ کمیٹی نے پاور اور انفراسٹرکچر سیکٹرز کی آپریشنل کمزوریوں، گردشی قرضے (سرکلر ڈیٹ) اور درپیش مالی خطرات کا جائزہ لیتے ہوئے مسلسل خسارے میں چلنے والے اداروں میں اصلاحات تیز کرنے، مالی نظم و ضبط قائم کرنے اور سرکاری وسائل پر انحصار کم کرنے کی ہدایت کی۔ علاوہ ازیں اجلاس میں پرنٹنگ کارپوریشن آف پاکستان کے بورڈ میں آزاد ڈائریکٹرز کی تقرری کی منظوری بھی دی گئی