آن لائن مالی فراڈ کی روک تھام کیلئے نیشنل سائبر فراڈ کوآرڈینیشن سیل کے قیام کی تجویز

پاکستان میں آن لائن مالی فراڈ کی روک تھام اور سائبر جرائم کی تحقیقات کو مؤثر بنانے کے لیے ‘نیشنل سائبر فراڈ کوآرڈینیشن سیل’ قائم کرنے کی تجویز سامنے آئی ہے، جس میں این سی سی آئی اے، اسٹیٹ بینک، نادرا، پی ٹی اے اور ایس ای سی پی سمیت دیگر متعلقہ اداروں کو شامل کیا جائے گا۔ حکام کے مطابق اس مربوط نظام کا مقصد مختلف اداروں کے درمیان آن لائن مالی فراڈ پر فوری ردعمل اور شواہد کا تبادلہ آسان بنانا ہے۔ منصوبے کے تحت نیشنل سائبر کرائم انویسٹی گیشن ایجنسی (NCCIA) ڈیجیٹل فرانزکس اور مقدمات درج کرنے کا کام سنبھالے گی، جبکہ اسٹیٹ بینک مشتبہ رقوم کی منتقلی روکنے کے لیے ڈیبٹ بلاکنگ، پی ٹی اے جعلی سمز و بلاکنگ اور نادرا مشتبہ شناختی کارڈز کی نشاندہی میں معاونت فراہم کرے گا۔