ہاکی ٹیسٹ سیریز: گرین شرٹس نے جنوبی کوریا کو مسلسل دوسری بار شکست دے دی

پاکستان نے چار میچوں پر مشتمل ہاکی ٹیسٹ سیریز کے دوسرے میچ میں جنوبی کوریا کو 1 کے مقابلے میں 3 گول سے شکست دے کر سیریز میں 2-0 کی برتری حاصل کر لی ہے۔

میچ کا پہلا کوارٹر سنسنی خیز رہا تاہم دونوں ٹیمیں کوئی گول اسکور نہ کر سکیں۔ دوسرے کوارٹر میں جنوبی کوریا نے پہلا گول داغ کر میچ میں برتری حاصل کی، لیکن پاکستان نے شاندار واپسی کرتے ہوئے تیسرے کوارٹر میں عبدالرحمان کے بہترین گول کے ذریعے مقابلہ 1-1 سے برابر کر دیا۔ چوتھے اور آخری کوارٹر میں پاکستان کے ابوبکر نے جارحانہ کھیل کا مظاہرہ کرتے ہوئے مسلسل دو گول اسکور کر کے پاکستان کی فتح یقینی بنا دی۔

اس اہم میچ کو دیکھنے کے لیے صدر پاکستان ہاکی فیڈریشن محی الدین وانی اور گورنر خیبرپختونخوا فیصل کریم کنڈی بھی اسٹیڈیم میں موجود تھے۔ چار میچوں کی اس سیریز کا تیسرا ٹیسٹ میچ 4 اگست کو کھیلا جائے گا جہاں قومی ٹیم کے پاس سیریز اپنے نام کرنے کا بہترین موقع ہو گا۔