پرو ہاکی لیگ کیلئے پاکستانی ہاکی کھلاڑیوں کا ٹریننگ کیمپ اچانک ختم

پاکستان ہاکی ٹیم کے کھلاڑیوں کا پرو ہاکی لیگ کے لیے لگایا گیا ٹریننگ کیمپ اچانک ختم کر دیا گیا، جس کے بعد تمام قومی کھلاڑی اپنے اپنے گھروں کو روانہ ہو گئے۔ ذرائع کے مطابق کیمپ کو پیر تک جاری رہنا تھا، تاہم اسے شیڈول سے پہلے ہی ختم کر دیا گیا۔

ذرائع کا کہنا ہے کہ کیمپ کے اچانک خاتمے کی بڑی وجہ کھلاڑیوں کو معاوضوں کی عدم ادائیگی ہے۔ ہاکی فیڈریشن نے کھلاڑیوں کو آج معاوضہ ادا کرنے کی یقین دہانی کروا رکھی تھی، لیکن تاحال کسی بھی کھلاڑی کو ادائیگی نہیں کی جا سکی۔

معاوضے نہ ملنے پر کھلاڑیوں نے ٹریننگ کیمپ میں شرکت سے انکار کر دیا، جس کے بعد کیمپ ختم کرنے کا فیصلہ کیا گیا۔ واضح رہے کہ پاکستان ہاکی ٹیم کی 2 فروری کو آسٹریلیا روانگی شیڈول ہے، تاہم موجودہ صورتحال نے ٹیم کی تیاریوں پر سنگین سوالات کھڑے کر دیے ہیں۔

اس غیر یقینی صورتحال پر ہاکی حلقوں میں تشویش پائی جاتی ہے، جبکہ شائقین کی جانب سے پاکستان ہاکی فیڈریشن کی کارکردگی پر بھی شدید تنقید کی جا رہی ہے۔