خطے میں موجودہ بحرانوں کی بڑی وجہ اسرائیل کی توسیع پسندانہ کوششیں ہیں: دفتر خارجہ

پاکستان نے مشرقِ وسطیٰ میں جاری شدید بحرانوں اور کشیدگی کی بنیادی وجہ اسرائیل کی توسیع پسندانہ پالیسیوں کو قرار دیتے ہوئے کہا ہے کہ ان اقدامات سے فلسطین کے علاوہ شام، لبنان اور دیگر پڑوسی ممالک بھی شدید متاثر ہو رہے ہیں۔

دفتر خارجہ کے ترجمان سجاد حیدر خان نے اسلام آباد میں ہفتہ وار پریس بریفنگ کے دوران واضح کیا کہ ‘مکہ اتحاد’ کسی مخصوص ملک کے خلاف نہیں بلکہ خطے میں امن و استحکام کے فروغ کے لیے قائم کیا گیا ہے۔ امریکا کے ساتھ تعلقات پر بات کرتے ہوئے ترجمان کا کہنا تھا کہ واشنگٹن میں حکومت کسی بھی سیاسی جماعت کی ہو، پاکستان کے امریکا کے ساتھ ہمیشہ بہترین تعلقات رہے ہیں اور پاکستان تجارت، سرمایہ کاری، سیکیورٹی اور انسدادِ دہشت گردی سمیت تمام شعبوں میں تعاون جاری رکھے گا۔

پاک بھارت تعلقات اور ویزا پالیسی کی وضاحت کرتے ہوئے سجاد حیدر خان نے کہا کہ پاکستان نے بھارتی شہریوں کے لیے ویزوں کا اجرا بند نہیں کیا اور اگر بھارتی پنجاب کے وزیر اعلیٰ بھگونت مان پاکستان آنا چاہیں تو انہیں ویزا جاری کرنے پر کوئی پابندی نہیں ہے۔ انہوں نے بتایا کہ گزشتہ سال 9 ہزار سے زائد جبکہ رواں سال بھی 4 ہزار سے زائد بھارتی سکھ یاتریوں کو ویزے جاری کیے گئے۔ دفتر خارجہ نے کہا کہ بھارت نے مئی 2025 کے بعد کرتارپور راہداری کے ذریعے زائرین کی آمدورفت معطل کر رکھی ہے، تاہم جیسے ہی پابندیاں ختم ہوں گی، پاکستان سکھ یاتریوں کا استقبال کرنے کے لیے مکمل تیار ہے۔ ترجمان نے مزید بتایا کہ پاکستان کو 20 سے 22 نومبر تک نئی دہلی میں ہونے والے شنگھائی تعاون تنظیم (SCO) کے اجلاس کا دعوت نامہ موصول ہو گیا ہے، اور اس میں شرکت کا حتمی فیصلہ ادارہ جاتی مشاورت کے بعد قیادت کرے گی۔