غزہ کے ہسپتال پر اسرائیلی حملہ، سرجن سمیت 5 افراد شہید ہوگئے

امریکا کی ثالثی میں طے پانے والے جنگ بندی معاہدے کی سنگین خلاف ورزی کرتے ہوئے اسرائیل نے غزہ کے جنوبی شہر خان یونس میں واقع ناصر ہسپتال کی عمارت پر فضائی حملہ کیا ہے، جس کے نتیجے میں ایک سرجن سمیت کم از کم 5 فلسطینی شہید اور 20 سے زائد زخمی ہو گئے۔ غزہ کی سول ڈیفنس سروس کے ترجمان محمود باسل کے مطابق حملے میں ہسپتال کے شعبہ سرجری کو نشانہ بنایا گیا جس سے عمارت کو شدید نقصان پہنچا، جبکہ شہید ہونے والے ڈاکٹر کی شناخت سرجن رزق ابو شعیرہ کے نام سے ہوئی ہے۔ غزہ کے محکمہ صحت کے حکام کا کہنا ہے کہ اکتوبر 2025ء میں جنگ بندی معاہدے کے نفاذ کے بعد سے اب تک اسرائیلی حملوں میں 1600 سے زائد فلسطینی شہید ہو چکے ہیں، جبکہ 7 اکتوبر 2023ء سے جاری اسرائیلی جارحیت میں شہید ہونے والے فلسطینیوں کی مجموعی تعداد 74 ہزار سے تجاوز کر گئی ہے۔