رواں مالی سال کی پہلی ششماہی میں اہم شعبوں کی برآمدات میں کمی

ادارہ شماریات کی تازہ رپورٹ کے مطابق رواں مالی سال کے پہلے 6 ماہ کے دوران ملک کے بڑے شعبوں کی برآمدات میں واضح کمی دیکھنے میں آئی ہے۔

اعداد و شمار کے مطابق جولائی تا دسمبر غذائی اجناس کی برآمدات میں 40.29 فیصد کمی ہوئی اور اس عرصے میں غذائی اجناس کی مجموعی برآمدات کا حجم 2 ارب 36 کروڑ ڈالر ریکارڈ کیا گیا۔ گزشتہ مالی سال کی پہلی ششماہی میں یہ حجم تقریباً 4 ارب ڈالر تھا۔

دستاویز میں مزید بتایا گیا کہ چاول کی برآمدات میں 49.90 فیصد اور سبزیوں کی برآمدات میں 36.80 فیصد کمی ہوئی۔ جبکہ ٹیکسٹائل برآمدات میں معمولی اضافہ 0.90 فیصد ریکارڈ کیا گیا اور اس کا حجم 9 ارب 16 کروڑ ڈالر رہا۔

ادارہ شماریات کے مطابق جولائی تا دسمبر پلاسٹک کے سامان کی برآمدات میں 43.66 فیصد کمی، فارماسیوٹیکل کی برآمدات میں 28.67 فیصد کمی اور ٹرانسپورٹ سامان کی برآمدات میں 36.51 فیصد کمی ہوئی۔

ماہرین کے مطابق برآمدات میں یہ کمی عالمی مارکیٹ میں طلب میں کمی، پیداواری لاگت میں اضافہ اور ملکی برآمدی حکمت عملی میں چیلنجز کی وجہ سے سامنے آئی ہے۔