پاکستان اور ڈنمارک کے درمیان توانائی کے شعبے میں سٹریٹجک تعاون، مفاہمتی یادداشت پر دستخط

پاکستان اور ڈنمارک نے توانائی کے شعبے میں دوطرفہ تعاون کو مزید وسعت دیتے ہوئے سٹریٹجک سیکٹر کوآپریشن پروگرام کے آغاز کے لیے مفاہمتی یادداشت (MoU) پر دستخط کر دیے ہیں۔ معاہدے پر سیکریٹری پاور ڈویژن ڈاکٹر فخرِ عالم عرفان اور پاکستان میں ڈنمارک کی سفیر ماجا ڈیروس مورٹینسن نے دستخط کیے، جبکہ وفاقی وزیر توانائی سردار اویس احمد خان لغاری نے تقریب میں خصوصی شرکت کی۔ اس معاہدے کے تحت دونوں ممالک حکومت سے حکومت (G2G) سطح پر تعاون کو مضبوط بناتے ہوئے طویل المدتی توانائی منصوبہ بندی، قومی گرڈ میں قابلِ تجدید (گرین) توانائی کا انضمام، اور صنعتی شعبے میں توانائی کی استعداد کار میں بہتری جیسے تین اہم محوروں پر مشترکہ کام کریں گے۔

اس پروگرام کے تحت ڈنمارک کے ماہرین پاکستان کے وفاقی توانائی اداروں کو جدید تکنیکی معاونت اور تجارب فراہم کریں گے تاکہ ادارہ جاتی اور تکنیکی صلاحیتوں میں اضافہ کیا جا سکے۔ حکام کا کہنا ہے کہ یہ اسٹریٹجک شراکت داری پاکستان کو گرین انرجی کی منتقلی میں تیز رفتاری لانے، قومی موسمیاتی اہداف کو کم لاگت میں حاصل کرنے اور ملک میں صاف، محفوظ اور پائیدار توانائی کا نظام تشکیل دینے میں اہم پیش رفت ثابت ہوگی۔