پاکستان نے تاریخ میں پہلی بار قرض میچورٹی سے قبل واپس کرنا شروع کر دیا،مشیر وزیر خزانہ خرم شہزاد

پاکستان کی معاشی تاریخ میں پہلی بار حکومت نے ملکی قرضے میچورٹی سے قبل واپس کرنے کا عمل شروع کر دیا ہے۔ مشیر وزیر خزانہ خرم شہزاد کے مطابق گزشتہ 14 ماہ کے دوران حکومت نے مجموعی طور پر 3 ہزار 650 ارب روپے کا ملکی قرضہ قبل از وقت ادا کیا۔

خرم شہزاد نے بتایا کہ اسٹیٹ بینک آف پاکستان نے آج مزید 300 ارب روپے کی تازہ قبل از وقت ادائیگی کر دی ہے۔ ان کے مطابق مالی سال 2026 کے پہلے سات ماہ میں 2 ہزار 150 ارب روپے سے زائد قرضہ ریٹائر کیا گیا، جو مالی سال 2025 کے مقابلے میں 44 فیصد زیادہ ہے۔

مشیر وزیر خزانہ کے مطابق اسٹیٹ بینک کا قرضہ تقریباً 44 فیصد کم ہو کر 5 ہزار 500 ارب سے 3 ہزار ارب روپے رہ گیا ہے، جبکہ 2029 میں میچور ہونے والا قرضہ بھی کئی سال پہلے ادا کر دیا گیا ہے۔

انہوں نے بتایا کہ قبل از وقت ادائیگیوں میں 65 فیصد اسٹیٹ بینک، 30 فیصد ٹی بلز اور 5 فیصد پاکستان انویسٹمنٹ بانڈز شامل ہیں۔ مجموعی سرکاری قرضہ 80.5 ٹریلین روپے سے کم ہو کر 80 ٹریلین کے قریب آ گیا ہے جبکہ قرضہ جی ڈی پی تناسب 74 فیصد سے کم ہو کر تقریباً 70 فیصد پر آ چکا ہے۔

خرم شہزاد کے مطابق مالی نظم و ضبط کے باعث ٹیکس دہندگان کو 850 ارب روپے کی بچت ہوئی جبکہ مالی سال 2026 میں مزید 800 ارب روپے کی بچت متوقع ہے، جس سے کم رسک، کم لاگت اور ترقی کیلئے زیادہ مالی گنجائش پیدا ہوگی۔